世界盃
1 year ago 0
世界盃Day 1 Preview:讓氣氛燃燒吧
Previous Next

好多球迷認為今屆世界盃氣氛甚弱,即使今晚準備開波,但市面上還是少了一股大戰在即的味道。

要解釋無氣氛的原因,或者寫十日十夜都未夠。但最簡單兩點,倒是值得分享一下。首先,大家睇電視的習慣徹底改變,當中包括睇波的習慣。以往睇直播是大事,現在睇直播是例行公事,晚晚都有,睇到唔睇。試想想,十多日前的話題,依然是沙拿與沙治奧拉莫斯。與以往用足幾個月時間煲一個大賽,難以相提並論。當中更未提過手機上網對足球的影響。

另一個原因,是分組賽無太大重心賽事。8組抽籤結果出爐後,未見太多強強同組的比賽,西班牙對葡萄牙及比利時對英格蘭,可能較為觸目,但大部份球迷都認為兩隊都可順利出線,爭的只是首名,欠缺了一些賽前的話題。唯有希望開波後,氣氛可以燃燒吧。

揭幕戰是俄羅斯對沙特阿拉伯,以戲碼來說,實在弱得可憐。最慘是沙特實力已不強,俄羅斯亦無太強的戰鬥力,分分鐘合演一場悶戰。近日俄羅斯名宿簡察斯基炮轟這是廿年來最差的國家隊,其實不無道理。這場比賽,任何賽果都有可能發生,只希望有多少少入球,或者會悶上加悶。

所以今晚最強的看點,可能是普京的反應。估計鏡頭會不停捕捉這位俄羅斯總統,相信在開幕禮,他還可以歡歡喜喜笑容滿臉,但到比賽時,分分鐘出現改變。順風順水還可以,最怕球隊在落後下見到普京黑面。畢竟近日國際新聞的鏡頭,早已被「侵侵」及「金金」搶光了。

是日賽程

俄羅斯 對 沙特阿拉伯 14/6 23:00 莫斯科盧茲尼基球場

圖片來源: © Getty Images